Seshii forever


Direkt zum Seiteninhalt

Abschied 15.12.2009

15. Dezember 2009

Liebä Sascha

Es git kein Tag, a dem ich nöd a Dich dänke. Es isch für eus alli sehr schwer z` akzeptiere, dass Du nüme bi eus bisch, obwohl ich dich bis zu de letschte Minute vo Dim Läbe begleitet ha, cha ichs nöd fassä.

Mir wüssed was für en wunderbare Mänsch Du gsi bisch.
Das cha eus niemert neh! Niemert!!

Mini Gedankä gönd zrugg a de Tag vo de Diagnose.
Es isch schwär z`beschriben, wie`s eim d` Füess unter em Boden wegzieht - wo mer sich frögt, wie erkläre mer Dir das? Am afang häsch zwar gwüsst, dass es sich um e schweri Krankät handlet, aber du häsch nöd gwüsst, dass es d` Tumorä sind, wo dir sottig Schmerze bereitet.
Erst wo s`dir wieder echli besser gange isch hämmer Dir das gseit, au dass du dra Sterbe chönntisch, häsch gwüsst. Mir sind aber froh gsi das du dir e kei Gedanke ums Sterbe gmacht häsch. Dis Ziel isch gsi ohni Schmerzä z`si um schnäll wieder chöne heizgah.

Das isch au mis Ziel gsi! Ich ha alles unternoh das es Dir, i dere Zit, wo mer zäme im Spital verbracht händ, chli eifacher z`mache. Au wänn ich mich bi de Ärzt und bi einige vo de Pfläg sehr unbeliebt gmacht ha. Eigentlich ha ich di ganz Station und dene ihre Tagesablauf durenand gmacht bis es de hinterscht und letscht begriffe hätt wie`s du möchtisch. Drum hämmer scho gli d` Infusatore im Griff gha, händ sälber chli öppis dranume gmacht damit mer länger händ chönne verusse si. Leider isch oftmals de blöd Akku vill z`schnäll leer gsi.
Am Afang isch es Dir sehr schwergfalle Dich z`pfläge la. Keis Wunder, grad i dem Alter isch es wohl am schwerste so öppis chönne zuezlah. Drum ha ich die Arbet so vill wie möglich übernoh, bi dere wo i gmerkt ha das es dir unagnehm isch.
Mit de Zit häsch dich denn aber dra gwöhnt, au will gmerkt häsch, dass das ihre Job isch. Trotzdem bruchts vill Wille zum akzeptiere, das mer Hilf brucht und die dänn cha anäh.
Jede Tag, wo ich mit Dir ha chönne zäme si isch für mich en g`schänkte Tag gsi! I de Zit vo de Therapie hätts Zite geh wo mir de ganz Tag brüelet händ,wo du zu mir gseit häsch „ Mami, ich mage nüme, ich mag eifach nüme!" Oder det wo tagelang am grüeni Galle kotze gsi bisch und ich zu Dir gseit ha, dass ich scho lang nüme wür Chönne wenn ich da wür ligge.

Ich bin so stolz uf Dich gsi wie du kämpft häsch und Du Dini Krankheit hignoh häsch ohni nach em „warum ich" z`fröge.
Au wänn das schlimmi Zite gsi sind hätts au Momänt geh, wo mers mega lustig gha händ.
Es sind die schöne Sache wo in Erinnerig blibed.
Es isch es schöns Gfühl gsi, wie guet du Dich dehei häsch chönne erhole und dis Läbe doch no chli häsch dörfe gnüsse. Ich bin dim Papi, dim Brüeder und vorallem dine Fründe unendlich dankbar für das, wo sie für Dich gmacht händ!
Und zwar händs das nöd us Mitleid, sondern us tüfster Innigkeit gmacht, obwohl s nöd immer liecht gsi isch! Dänn natürlich häsch au Täg gha, an dene Du kei Läbesfreud meh gha häsch.
A söttig Tagä hätt mer di au nöd chönne ufmuntere, und mer hätts au nüme probiert, dänn so Täg ghöred zum Läbe, au i dem vo Gsunde Mänsche.

Liebä Sascha mer werded Dich nie vergässe!
Danke das ich ha dörfe Dis Mami si.
Ich bin so stolz uf mini zwei Jungs.

Mini Gedanke wänn ich an Sascha dänke, sind Schmerz, Wehmuet, Truur, Wuet, aber au Stolz und Glück ihn g`ha z`ha. Ich hoffe, dass er s` jetzt guet hätt und es ihm besser gaht, da wo er jetzt isch. I freu mi, dass mer eus eines Tages wiedergsehnd.

Schutzängel Songtext

Wie us heitrem Himmel het's üs alli troffe
niemer het so früeh scho a so öppis dänkt
es het ke Chance gäh das me no hätt chönne hoffe
dass sich alles wider iränkt..

Es het's so niemer e so richtig chönne gloube
weder begrieffe, no irgendwie verstah
wie hett dä da obe nume chönne erloube
dass du so früeh hesch müesse gah?

Du wachsch jetz sicher über üs u bisch e Ängel
mir gseh di nid aber mir wüsse du bisch da
du passisch uf das üs hie unde nüt passiert
mir vergässe di nie
mir vergässe di nie!

Hesch mir doch ersch no grad verzellt was
du heigsch planet
du hesch mir gseit du heigisch grosses im sinn
us dine Ouge het so viel läbe gstrahlet
so viel freud i dire Stimm.

Mir hei doch gmeint mir heige z' ganze
läbe vor üs mir hei üs starch u frei gfüehlt am See
woni ha tschüss gseit hani doch nid chönne ahne
das i di niemeh wirde gseh.

Du wachsch jetz sicher über üs u bisch
e Ängel, mir gseh di nid aber mir
wüsse du bisch da, du passisch uf
das üs hie unde nüt passiert, mir vergässe di nie

mir vergässe di nie.

* * *

Seshii forever | Gegenwart | Die Erde dreht sich einfach weiter | Wie alles begann | Leise kam das Leid | Die Krankheit | Kampf um`s Überleben 1 | Kampf um`s Überleben 2 | Ein nie zu Ende gehender Albtraum | Tag X | 5.Dez.2009 | Abschied 15.12.2009 | Abschied 20.12.2009 | Gedanken und Erinnerungen | Gefühle der Trauer | Danke | Gästebuch | Links | Sitemap

Counter/Zähler
Creative Commons License
This work is licensed under a Creative Commons Attribution 3.0 Unported License.

Zurück zum Seiteninhalt | Zurück zum Hauptmenü